८. वक्कलित्थेरगाथा

३५०. ‘‘वातरोगाभिनीतो त्वं, विहरं कानने वने;

पविट्ठगोचरे लूखे, कथं भिक्खु करिस्ससि.

३५१. ‘‘पीतिसुखेन विपुलेन, फरमानो समुस्सयं;

लूखम्पि अभिसम्भोन्तो, विहरिस्सामि कानने.

३५२. ‘‘भावेन्तो सतिपट्ठाने, इन्द्रियानि बलानि च;

बोज्झङ्गानि च भावेन्तो, विहरिस्सामि कानने.

३५३. ‘‘आरद्धवीरिये पहितत्ते, निच्चं दळ्हपरक्कमे [आरद्धवीरियो पहितत्तो, निच्चं दळ्हपरक्कमो (सी.)];

समग्गे सहिते दिस्वा, विहरिस्सामि कानने.

३५४. ‘‘अनुस्सरन्तो सम्बुद्धं, अग्गं दन्तं समाहितं;

अतन्दितो रत्तिन्दिवं, विहरिस्सामि कानने’’ति.

… वक्कलित्थेरो….