६. नदीकस्सपत्थेरगाथा

३४०. ‘‘अत्थाय वत मे बुद्धो, नदिं नेरञ्जरं अगा;

यस्साहं धम्मं सुत्वान, मिच्छादिट्ठिं विवज्जयिं.

३४१. ‘‘यजिं उच्चावचे यञ्ञे, अग्गिहुत्तं जुहिं अहं;

‘एसा सुद्धी’ति मञ्ञन्तो, अन्धभूतो [अन्धीभूतो (क.)] पुथुज्जनो.

३४२. ‘‘दिट्ठिगहनपक्खन्दो [पक्खन्तो (सी.), पक्खन्नो (स्या. पी.)], परामासेन मोहितो;

असुद्धिं मञ्ञिसं सुद्धिं, अन्धभूतो अविद्दसु.

३४३. ‘‘मिच्छादिट्ठि पहीना मे, भवा सब्बे पदालिता [विदालिता (क.)];

जुहामि दक्खिणेय्यग्गिं, नमस्सामि तथागतं.

३४४. ‘‘मोहा सब्बे पहीना मे, भवतण्हा पदालिता;

विक्खीणो जातिसंसारो, नत्थि दानि पुनब्भवो’’ति.

… नदीकस्सपो थेरो….