६. सेनकत्थेरगाथा

२८७. ‘‘स्वागतं वत मे आसि, गयायं गयफग्गुया;

यं अद्दसासिं सम्बुद्धं, देसेन्तं धम्ममुत्तमं.

२८८. ‘‘महप्पभं गणाचरियं, अग्गपत्तं विनायकं;

सदेवकस्स लोकस्स, जिनं अतुलदस्सनं.

२८९. ‘‘महानागं महावीरं, महाजुतिमनासवं;

सब्बासवपरिक्खीणं, सत्थारमकुतोभयं.

२९०. ‘‘चिरसंकिलिट्ठं वत मं, दिट्ठिसन्दानबन्धितं [सन्धितं (सी. स्या.), सन्दितं (पी. सी. अट्ठ.)];

विमोचयि सो भगवा, सब्बगन्थेहि सेनक’’न्ति.

… सेनको थेरो….