१२. मुदितत्थेरगाथा

३११. ‘‘पब्बजिं जीविकत्थोहं, लद्धान उपसम्पदं;

ततो सद्धं पटिलभिं, दळ्हवीरियो परक्कमिं.

३१२. ‘‘कामं भिज्जतुयं कायो, मंसपेसी विसीयरुं [विसियन्तु (क.)];

उभो जण्णुकसन्धीहि, जङ्घायो पपतन्तु मे.

३१३. ‘‘नासिस्सं न पिविस्सामि, विहारा च न निक्खमे;

नपि पस्सं निपातेस्सं, तण्हासल्ले अनूहते.

३१४. ‘‘तस्स मेवं विहरतो, पस्स वीरियपरक्कमं;

तिस्सो विज्जा अनुप्पत्ता, कतं बुद्धस्स सासन’’न्ति.

… मुदितो थेरो….

चतुक्कनिपातो निट्ठितो.