५. चरियाकथा

२८. चरियाति, अट्ठ चरियायो – इरियापथचरिया, आयतनचरिया, सतिचरिया, समाधिचरिया, ञाणचरिया, मग्गचरिया, पत्तिचरिया, लोकत्थचरियाति.

इरियापथचरियाति चतूसु इरियापथेसु. आयतनचरियाति छसु अज्झत्तिकबाहिरेसु आयतनेसु. सतिचरियाति चतूसु सतिपट्ठानेसु. समाधिचरियाति चतूसु झानेसु. ञाणचरियाति चतूसु अरियसच्चेसु. मग्गचरियाति चतूसु अरियमग्गेसु. पत्तिचरियाति चतूसु सामञ्ञफलेसु. लोकत्थचरियाति तथागतेसु अरहन्तेसु सम्मासम्बुद्धेसु पदेसे [पदेसो (स्या.)] पच्चेकबुद्धेसु पदेसे सावकेसु.

इरियापथचरिया च पणिधिसम्पन्नानं. आयतनचरिया च इन्द्रियेसु गुत्तद्वारानं. सतिचरिया च अप्पमादविहारीनं. समाधिचरिया च अधिचित्तमनुयुत्तानं. ञाणचरिया च बुद्धिसम्पन्नानं. मग्गचरिया च सम्मापटिपन्नानं. पत्तिचरिया च अधिगतफलानं. लोकत्थचरिया च तथागतानं अरहन्तानं सम्मासम्बुद्धानं पदेसे पच्चेकबुद्धानं पदेसे सावकानं. इमा अट्ठ चरियायो.

२९. अपरापि अट्ठ चरियायो. अधिमुच्चन्तो सद्धाय चरति, पग्गण्हन्तो वीरियेन चरति, उपट्ठापेन्तो सतिया चरति, अविक्खेपं करोन्तो समाधिना चरति, पजानन्तो पञ्ञाय चरति, विजानन्तो विञ्ञाणचरियाय चरति, एवं पटिपन्नस्स कुसला धम्मा आयापेन्तीति आयतनचरियाय चरति, एवं पटिपन्नो विसेसमधिगच्छतीति विसेसचरियाय चरति. इमा अट्ठ चरियायो.

अपरापि अट्ठ चरियायो. दस्सनचरिया च सम्मादिट्ठिया, अभिनिरोपनचरिया च सम्मासङ्कप्पस्स, परिग्गहचरिया च सम्मावाचाय, समुट्ठानचरिया च सम्माकम्मन्तस्स, वोदानचरिया च सम्माआजीवस्स, पग्गहचरिया च सम्मावायामस्स, उपट्ठानचरिया च सम्मासतिया, अविक्खेपचरिया च सम्मासमाधिस्स. इमा अट्ठ चरियायोति.

चरियाकथा निट्ठिता.