८. पटिसम्भिदावारो

३७. ‘‘‘यावता अत्थपटिसम्भिदाय अत्थपटिसम्भिदट्ठो, ञातो दिट्ठो विदितो सच्छिकतो फस्सितो पञ्ञाय. अफस्सितो पञ्ञाय अत्थपटिसम्भिदट्ठो नत्थी’ति – चक्खुं उदपादि…पे… आलोको उदपादि’’. अत्थपटिसम्भिदाय अत्थपटिसम्भिदट्ठे पञ्चवीसति धम्मा, पञ्चवीसति अत्था, पञ्ञास निरुत्तियो, सतं ञाणानि.

‘‘‘यावता धम्मपटिसम्भिदाय धम्मपटिसम्भिदट्ठो…पे… यावता निरुत्तिपटिसम्भिदाय निरुत्तिपटिसम्भिदट्ठो…पे… यावता पटिभानपटिसम्भिदाय पटिभानपटिसम्भिदट्ठो, ञातो दिट्ठो विदितो सच्छिकतो फस्सितो पञ्ञाय. अफस्सितो पञ्ञाय पटिभानपटिसम्भिदट्ठो नत्थी’ति – चक्खुं उदपादि …पे… आलोको उदपादि’’. पटिभानपटिसम्भिदट्ठे पञ्चवीसति धम्मा, पञ्चवीसति अत्था, पञ्ञास निरुत्तियो, सतं ञाणानि.

चतूसु पटिसम्भिदासु सतं धम्मा, सतं अत्था, द्वे निरुत्तिसतानि, चत्तारि ञाणसतानि.