६४-६७. सुद्धिकपटिसम्भिदाञाणनिद्देसो

११०. कथं अत्थपटिसम्भिदे ञाणं, धम्मपटिसम्भिदे ञाणं, निरुत्तिपटिसम्भिदे ञाणं, पटिभानपटिसम्भिदे ञाणं? अत्थेसु ञाणं अत्थपटिसम्भिदा, धम्मेसु ञाणं धम्मपटिसम्भिदा, निरुत्तीसु ञाणं निरुत्तिपटिसम्भिदा, पटिभानेसु ञाणं पटिभानपटिसम्भिदा. अत्थनानत्ते पञ्ञा अत्थपटिसम्भिदे ञाणं, धम्मनानत्ते पञ्ञा धम्मपटिसम्भिदे ञाणं, निरुत्तिनानत्ते पञ्ञा निरुत्तिपटिसम्भिदे ञाणं, पटिभाननानत्ते पञ्ञा पटिभानपटिसम्भिदे ञाणं, अत्थववत्थाने पञ्ञा अत्थपटिसम्भिदे ञाणं, धम्मववत्थाने पञ्ञा धम्मपटिसम्भिदे ञाणं निरुत्तिववत्थाने पञ्ञा निरुत्तिपटिसम्भिदे ञाणं, पटिभानववत्थाने पञ्ञा पटिभानपटिसम्भिदे ञाणं.

अत्थसल्लक्खणे पञ्ञा अत्थपटिसम्भिदे ञाणं, धम्मसल्लक्खणे पञ्ञा धम्मपटिसम्भिदे ञाणं, निरुत्तिसल्लक्खणे पञ्ञा निरुत्तिपटिसम्भिदे ञाणं, पटिभानसल्लक्खणे पञ्ञा पटिभानपटिसम्भिदे ञाणं. अत्थूपलक्खणे पञ्ञा अत्थपटिसम्भिदे ञाणं, धम्मूपलक्खणे पञ्ञा धम्मपटिसम्भिदे ञाणं, निरुत्तूपलक्खणे पञ्ञा निरुत्तिपटिसम्भिदे ञाणं, पटिभानूपलक्खणे पञ्ञा पटिभानपटिसम्भिदे ञाणं.

अत्थप्पभेदे पञ्ञा अत्थपटिसम्भिदे ञाणं, धम्मप्पभेदे पञ्ञा धम्मपटिसम्भिदे ञाणं, निरुत्तिप्पभेदे पञ्ञा निरुत्तिपटिसम्भिदे ञाणं, पटिभानप्पभेदे पञ्ञा पटिभानपटिसम्भिदे ञाणं. अत्थप्पभावने पञ्ञा अत्थपटिसम्भिदे ञाणं, धम्मप्पभावने पञ्ञा धम्मपटिसम्भिदे ञाणं, निरुत्तिप्पभावने पञ्ञा निरुत्तिपटिसम्भिदे ञाणं, पटिभानप्पभावने पञ्ञा पटिभानपटिसम्भिदे ञाणं.

अत्थजोतने पञ्ञा अत्थपटिसम्भिदे ञाणं, धम्मजोतने पञ्ञा धम्मपटिसम्भिदे ञाणं, निरुत्तिजोतने पञ्ञा निरुत्तिपटिसम्भिदे ञाणं, पटिभानजोतने पञ्ञा पटिभानपटिसम्भिदे ञाणं. अत्थविरोचने पञ्ञा अत्थपटिसम्भिदे ञाणं, धम्मविरोचने पञ्ञा धम्मपटिसम्भिदे ञाणं, निरुत्तिविरोचने पञ्ञा निरुत्तिपटिसम्भिदे ञाणं, पटिभानविरोचने पञ्ञा पटिभानपटिसम्भिदे ञाणं. अत्थप्पकासने पञ्ञा अत्थपटिसम्भिदे ञाणं, धम्मप्पकासने पञ्ञा धम्मपटिसम्भिदे ञाणं, निरुत्तिप्पकासने पञ्ञा निरुत्तिपटिसम्भिदे ञाणं, पटिभानप्पकासने पञ्ञा पटिभानपटिसम्भिदे ञाणं. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘अत्थपटिसम्भिदे ञाणं, धम्मपटिसम्भिदे ञाणं, निरुत्तिपटिसम्भिदे ञाणं, पटिभानपटिसम्भिदे ञाणं’’.

सुद्धिकपटिसम्भिदाञाणनिद्देसो सत्तसट्ठिमो.