४३. पदेसविहारञाणनिद्देसो

९४. कथं समोदहने पञ्ञा पदेसविहारे ञाणं? मिच्छादिट्ठिपच्चयापि वेदयितं, मिच्छादिट्ठिवूपसमपच्चयापि वेदयितं. सम्मादिट्ठिपच्चयापि वेदयितं, सम्मादिट्ठिवूपसमपच्चयापि वेदयितं. मिच्छासङ्कप्पपच्चयापि वेदयितं, मिच्छासङ्कप्पवूपसमपच्चयापि वेदयितं. सम्मासङ्कप्पपच्चयापि वेदयितं, सम्मासङ्कप्पवूपसमपच्चयापि वेदयितं…पे… मिच्छाविमुत्तिपच्चयापि वेदयितं, मिच्छाविमुत्तिवूपसमपच्चयापि वेदयितं. सम्माविमुत्तिपच्चयापि वेदयितं, सम्माविमुत्तिवूपसमपच्चयापि वेदयितं. छन्दपच्चयापि वेदयितं, छन्दवूपसमपच्चयापि वेदयितं. वितक्कपच्चयापि वेदयितं, वितक्कवूपसमपच्चयापि वेदयितं. सञ्ञापच्चयापि वेदयितं, सञ्ञावूपसमपच्चयापि वेदयितं.

छन्दो च अवूपसन्तो होति, वितक्को च अवूपसन्तो होति, सञ्ञा च अवूपसन्ता होति, तप्पच्चयापि वेदयितं. छन्दो च वूपसन्तो होति, वितक्को च अवूपसन्तो होति, सञ्ञा च अवूपसन्ता होति, तप्पच्चयापि वेदयितं. छन्दो च वूपसन्तो होति, वितक्को च वूपसन्तो होति, सञ्ञा च अवूपसन्ता होति, तप्पच्चयापि वेदयितं. छन्दो च वूपसन्तो होति, वितक्को च वूपसन्तो होति, सञ्ञा च वूपसन्ता होति, तप्पच्चयापि वेदयितं. अप्पत्तस्स पत्तिया अत्थि आसवं, तस्मिम्पि ठाने अनुप्पत्ते तप्पच्चयापि वेदयितं. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘समोदहने पञ्ञा पदेसविहारे ञाणं’’.

पदेसविहारञाणनिद्देसो तेचत्तालीसमो.