३७. सल्लेखट्ठञाणनिद्देसो

८८. कथं पुथुनानत्तेकत्ततेजपरियादाने पञ्ञा सल्लेखट्ठे [पुथुनानत्तेकत्ततेजपरियादाने (क.)] ञाणं? पुथूति – रागो पुथु, दोसो पुथु, मोहो पुथु, कोधो…पे… उपनाहो… मक्खो… पळासो… इस्सा… मच्छरियं… माया… साठेय्यं… थम्भो… सारम्भो… मानो… अतिमानो… मदो… पमादो… सब्बे किलेसा… सब्बे दुच्चरिता… सब्बे अभिसङ्खारा… सब्बे भवगामिकम्मा.

नानत्तेकत्तन्ति कामच्छन्दो नानत्तं, नेक्खम्मं एकत्तं. ब्यापादो नानत्तं, अब्यापादो एकत्तं. थिनमिद्धं नानत्तं, आलोकसञ्ञा एकत्तं. उद्धच्चं नानत्तं, अविक्खेपो एकत्तं. विचिकिच्छा नानत्तं, धम्मववत्थानं एकत्तं. अविज्जा नानत्तं, ञाणं एकत्तं. अरति नानत्तं, पामोज्जं एकत्तं. नीवरणा नानत्तं, पठमं झानं एकत्तं…पे… सब्बे किलेसा नानत्तं, अरहत्तमग्गो एकत्तं.

तेजोति पञ्च तेजा – चरणतेजो, गुणतेजो, पञ्ञातेजो, पुञ्ञतेजो, धम्मतेजो. चरणतेजेन तेजितत्ता दुस्सील्यतेजं परियादियति. गुणतेजेन तेजितत्ता अगुणतेजं परियादियति. पञ्ञातेजेन तेजितत्ता दुप्पञ्ञतेजं परियादियति. पुञ्ञतेजेन तेजितत्ता अपुञ्ञतेजं परियादियति. धम्मतेजेन तेजितत्ता अधम्मतेजं परियादियति.

सल्लेखोति कामच्छन्दो असल्लेखो, नेक्खम्मं सल्लेखो. ब्यापादो असल्लेखो, अब्यापादो सल्लेखो. थिनमिद्धं असल्लेखो, आलोकसञ्ञा सल्लेखो. उद्धच्चं असल्लेखो, अविक्खेपो सल्लेखो. विचिकिच्छा असल्लेखो, धम्मववत्थानं सल्लेखो. अविज्जा असल्लेखो, ञाणं सल्लेखो. अरति असल्लेखो, पामोज्जं सल्लेखो. नीवरणा असल्लेखो, पठमं झानं सल्लेखो…पे… सब्बकिलेसा असल्लेखो, अरहत्तमग्गो सल्लेखो. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘पुथुनानत्ततेजपरियादाने पञ्ञा सल्लेखट्ठे ञाणं’’.

सल्लेखट्ठञाणनिद्देसो सत्ततिंसतिमो.