३८. वीरियारम्भञाणनिद्देसो

८९. कथं असल्लीनत्तपहितत्तपग्गहट्ठे पञ्ञा वीरियारम्भे ञाणं? अनुप्पन्नानं पापकानं अकुसलानं धम्मानं अनुप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नानं पापकानं अकुसलानं धम्मानं पहानाय असल्लीनत्तपहितत्तपग्गहट्ठे पञ्ञा वीरियारम्भे ञाणं. अनुप्पन्नानं कुसलानं धम्मानं उप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नानं कुसलानं धम्मानं ठितिया असम्मोसाय भिय्योभावाय वेपुल्लाय भावनाय पारिपूरिया असल्लीनत्तपहितत्तपग्गहट्ठे पञ्ञा वीरियारम्भे ञाणं.

अनुप्पन्नस्स कामच्छन्दस्स अनुप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नस्स कामच्छन्दस्स पहानाय असल्लीनत्तपहितत्तपग्गहट्ठे पञ्ञा वीरियारम्भे ञाणं. अनुप्पन्नस्स नेक्खम्मस्स उप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नस्स नेक्खम्मस्स ठितिया असम्मोसाय भिय्योभावाय वेपुल्लाय भावनाय पारिपूरिया असल्लीनत्तपहितत्तपग्गहट्ठे पञ्ञा वीरियारम्भे ञाणं…पे….

अनुप्पन्नानं सब्बकिलेसानं अनुप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नानं सब्बकिलेसानं पहानाय असल्लीनत्तपहितत्तपग्गहट्ठे पञ्ञा वीरियारम्भे ञाणं…पे… अनुप्पन्नस्स अरहत्तमग्गस्स उप्पादाय असल्लीनत्तपहितत्तपग्गहट्ठे पञ्ञा वीरियारम्भे ञाणं. उप्पन्नस्स अरहत्तमग्गस्स ठितिया असम्मोसाय भिय्योभावाय वेपुल्लाय भावनाय पारिपूरिया असल्लीनत्तपहितत्तपग्गहट्ठे पञ्ञा वीरियारम्भे ञाणं. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘असल्लीनत्तपहितत्तपग्गहट्ठे पञ्ञा वीरियारम्भे ञाणं’’.

वीरियारम्भञाणनिद्देसो अट्ठतिंसतिमो.