३२. आनन्तरिकसमाधिञाणनिद्देसो

८०. कथं अविक्खेपपरिसुद्धत्ता आसवसमुच्छेदे पञ्ञा आनन्तरिकसमाधिम्हि ञाणं? नेक्खम्मवसेन चित्तस्स एकग्गता अविक्खेपो समाधि. तस्स समाधिस्स वसेन उप्पज्जति ञाणं. तेन ञाणेन आसवा खीयन्ति. इति पठमं समथो, पच्छा ञाणं. तेन ञाणेन आसवानं खयो होति. तेन वुच्चति – ‘‘अविक्खेपपरिसुद्धत्ता आसवसमुच्छेदे पञ्ञा आनन्तरिकसमाधिम्हि ञाणं’’.

आसवाति कतमे ते आसवा? कामासवो, भवासवो, दिट्ठासवो, अविज्जासवो. कत्थेते आसवा खीयन्ति? सोतापत्तिमग्गेन अनवसेसो दिट्ठासवो खीयति, अपायगमनीयो कामासवो खीयति, अपायगमनीयो भवासवो खीयति, अपायगमनीयो अविज्जासवो खीयति. एत्थेते आसवा खीयन्ति. सकदागामिमग्गेन ओळारिको कामासवो खीयति, तदेकट्ठो भवासवो खीयति, तदेकट्ठो अविज्जासवो खीयति. एत्थेते आसवा खीयन्ति. अनागामिमग्गेन अनवसेसो कामासवो खीयति, तदेकट्ठो भवासवो खीयति, तदेकट्ठो अविज्जासवो खीयति. एत्थेते आसवा खीयन्ति. अरहत्तमग्गेन अनवसेसो भवासवो खीयति, अनवसेसो अविज्जासवो खीयति. एत्थेते आसवा खीयन्ति.

अब्यापादवसेन …पे… आलोकसञ्ञावसेन… अविक्खेपवसेन… धम्मववत्थानवसेन… ञाणवसेन… पामोज्जवसेन… पठमज्झानवसेन… दुतियज्झानवसेन… ततियज्झानवसेन… चतुत्थज्झानवसेन… आकासानञ्चायतनसमापत्तिवसेन… विञ्ञाणञ्चायतनसमापत्तिवसेन… आकिञ्चञ्ञायतनसमापत्तिवसेन… नेवसञ्ञानासञ्ञायतनसमापत्तिवसेन… पथवीकसिणवसेन… आपोकसिणवसेन … तेजोकसिणवसेन… वायोकसिणवसेन… नीलकसिणवसेन… पीतकसिणवसेन… लोहितकसिणवसेन… ओदातकसिणवसेन… आकासकसिणवसेन… विञ्ञाणकसिणवसेन… बुद्धानुस्सतिवसेन… धम्मानुस्सतिवसेन… सङ्घानुस्सतिवसेन… सीलानुस्सतिवसेन… चागानुस्सतिवसेन… देवतानुस्सतिवसेन… आनापानस्सतिवसेन… मरणस्सतिवसेन… कायगतासतिवसेन… उपसमानुस्सतिवसेन… उद्धुमातकसञ्ञावसेन… विनीलकसञ्ञावसेन… विपुब्बकसञ्ञावसेन… विच्छिद्दकसञ्ञावसेन… विक्खायितकसञ्ञावसेन… विक्खित्तकसञ्ञावसेन… हतविक्खित्तकसञ्ञावसेन … लोहितकसञ्ञावसेन… पुळवकसञ्ञावसेन… अट्ठिकसञ्ञावसेन.

८१. दीघं अस्सासवसेन…पे… दीघं पस्सासवसेन… रस्सं अस्सासवसेन… रस्सं पस्सासवसेन… सब्बकायपटिसंवेदी अस्सासवसेन… सब्बकायपटिसंवेदी पस्सासवसेन… पस्सम्भयं कायसङ्खारं अस्सासवसेन… पस्सम्भयं कायसङ्खारं पस्सासवसेन… पीतिपटिसंवेदी अस्सासवसेन… पीतिपटिसंवेदी पस्सासवसेन… सुखपटिसंवेदी अस्सासवसेन… सुखपटिसंवेदी पस्सासवसेन… चित्तसङ्खारपटिसंवेदी अस्सासवसेन… चित्तसङ्खारपटिसंवेदी पस्सासवसेन… पस्सम्भयं चित्तसङ्खारं अस्सासवसेन… पस्सम्भयं चित्तसङ्खारं पस्सासवसेन… चित्तपटिसंवेदी अस्सासवसेन… चित्तपटिसंवेदी पस्सासवसेन… अभिप्पमोदयं चित्तं अस्सासवसेन… अभिप्पमोदयं चित्तं पस्सासवसेन… समादहं चित्तं…पे… विमोचयं चित्तं… अनिच्चानुपस्सी … विरागानुपस्सी… निरोधानुपस्सी… पटिनिस्सग्गानुपस्सी अस्सासवसेन… पटिनिस्सग्गानुपस्सी पस्सासवसेन चित्तस्स एकग्गता अविक्खेपो समाधि. तस्स समाधिस्स वसेन उप्पज्जति ञाणं, तेन ञाणेन आसवा खीयन्ति. इति पठमं समथो, पच्छा ञाणं. तेन ञाणेन आसवानं खयो होति. तेन वुच्चति – ‘‘अविक्खेपपरिसुद्धत्ता आसवसमुच्छेदे पञ्ञा आनन्तरिकसमाधिम्हि ञाणं’’.

आनन्तरिकसमाधिञाणनिद्देसो द्वत्तिंसतिमो.