१२. फलञाणनिद्देसो

६३. कथं पयोगप्पटिप्पस्सद्धिपञ्ञा फले ञाणं? सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मादिट्ठि. मग्गस्सेतं फलं.

अभिनिरोपनट्ठेन सम्मासङ्कप्पो मिच्छासङ्कप्पा वुट्ठाति तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासङ्कप्पो. मग्गस्सेतं फलं.

परिग्गहट्ठेन सम्मावाचा मिच्छावाचाय वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मावाचा. मग्गस्सेतं फलं.

समुट्ठानट्ठेन सम्माकम्मन्तो मिच्छाकम्मन्ता वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्माकम्मन्तो. मग्गस्सेतं फलं.

वोदानट्ठेन सम्माआजीवो मिच्छाआजीवा वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्माआजीवो. मग्गस्सेतं फलं.

पग्गहट्ठेन सम्मावायामो मिच्छावायामा वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मावायामो. मग्गस्सेतं फलं.

उपट्ठानट्ठेन सम्मासति मिच्छासतिया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासति. मग्गस्सेतं फलं.

अविक्खेपट्ठेन सम्मासमाधि मिच्छासमाधितो वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासमाधि. मग्गस्सेतं फलं.

सकदागामिमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि ओळारिका कामरागसञ्ञोजना पटिघसञ्ञोजना ओळारिका कामरागानुसया पटिघानुसया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासमाधि. मग्गस्सेतं फलं.

अनागामिमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि अनुसहगता कामरागसञ्ञोजना पटिघसञ्ञोजना अनुसहगता कामरागानुसया पटिघानुसया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासमाधि. मग्गस्सेतं फलं.

अरहत्तमग्गक्खणे दस्सनट्ठेन सम्मादिट्ठि…पे… अविक्खेपट्ठेन सम्मासमाधि रूपरागा अरूपरागा माना उद्धच्चा अविज्जाय मानानुसया भवरागानुसया अविज्जानुसया वुट्ठाति, तदनुवत्तककिलेसेहि च खन्धेहि च वुट्ठाति, बहिद्धा च सब्बनिमित्तेहि वुट्ठाति. तंपयोगप्पटिप्पस्सद्धत्ता उप्पज्जति सम्मासमाधि. मग्गस्सेतं फलं. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘पयोगप्पटिप्पस्सद्धिपञ्ञा फले ञाणं’’.

फलञाणनिद्देसो द्वादसमो.