८. जानन्ताजानन्तपापकरणपञ्हो

८. राजा आह ‘‘भन्ते नागसेन, यो जानन्तो पापकम्मं करोति, यो अजानन्तो पापकम्मं करोति, कस्स बहुतरं अपुञ्ञ’’न्ति? थेरो आह ‘‘यो खो, महाराज, अजानन्तो पापकम्मं करोति, तस्स बहुतरं अपुञ्ञ’’न्ति. ‘‘तेन हि, भन्ते नागसेन, यो अम्हाकं राजपुत्तो वा राजमहामत्तो वा अजानन्तो पापकम्मं करोति, तं मयं दिगुणं दण्डेमा’’ति? ‘‘तं किं मञ्ञसि, महाराज, तत्तं अयोगुळं आदित्तं सम्पज्जलितं सजोतिभूतं एको जानन्तो गण्हेय्य, एको अजानन्तो गण्हेय्य, कतमो [कस्स (क.)] बलवतरं डय्हेय्या’’ति. ‘‘यो खो, भन्ते, अजानन्तो गण्हेय्य, सो [तस्स (पी. क.)] बलवतरं डय्हेय्या’’ति. ‘‘एवमेव खो, महाराज, यो अजानन्तो पापकम्मं करोति, तस्स बहुतरं अपुञ्ञ’’न्ति.

‘‘कल्लोसि, भन्ते नागसेना’’ति.

जानन्ताजानन्तपापकरणपञ्हो अट्ठमो.