४. भगवतो ब्रह्मचारिपञ्हो

४. राजा आह ‘‘भन्ते नागसेन, बुद्धो ब्रह्मचारी’’ति? ‘‘आम, महाराज, भगवा ब्रह्मचारी’’ति. ‘‘तेन हि, भन्ते नागसेन, बुद्धो ब्रह्मुनो सिस्सो’’ति? ‘‘अत्थि पन ते, महाराज, हत्थिपामोक्खो’’ति? ‘‘अत्थि, भन्ते’’ति. ‘‘किंनु खो, महाराज, सो हत्थी कदाचि करहचि कोञ्चनादं नदतीति? ‘‘आम, भन्ते, नदती’’ति ‘‘तेन हि, महाराज, सो हत्थी कोञ्चसकुणस्स सिस्सो’’ति? ‘‘न हि, भन्ते’’ति. ‘‘किं पन, महाराज, ब्रह्मा सबुद्धिको अबुद्धिको’’ति? ‘‘सबुद्धिको, भन्ते’’ति. ‘‘तेन हि, महाराज, ब्रह्मा भगवतो सिस्सो’’ति.

‘‘कल्लोसि, भन्ते नागसेना’’ति.

भगवतो ब्रह्मचारिपञ्हो चतुत्थो.