५. पठमएसनासुत्तं

५४. वुत्तञ्हेतं भगवता, वुत्तमरहताति मे सुतं –

‘‘तिस्सो इमा, भिक्खवे, एसना. कतमा तिस्सो? कामेसना, भवेसना, ब्रह्मचरियेसना – इमा खो, भिक्खवे, तिस्सो एसना’’ति. एतमत्थं भगवा अवोच. तत्थेतं इति वुच्चति –

‘‘समाहितो सम्पजानो, सतो बुद्धस्स सावको;

एसना च पजानाति, एसनानञ्च सम्भवं.

‘‘यत्थ चेता निरुज्झन्ति, मग्गञ्च खयगामिनं;

एसनानं खया भिक्खु, निच्छातो परिनिब्बुतो’’ति.

अयम्पि अत्थो वुत्तो भगवता, इति मे सुतन्ति. पञ्चमं.