११. जरावग्गो

१४६. को नु हासो [किन्नु हासो (क.)] किमानन्दो, निच्चं पज्जलिते सति;

अन्धकारेन ओनद्धा, पदीपं न गवेसथ.

१४७. पस्स चित्तकतं बिम्बं, अरुकायं समुस्सितं;

आतुरं बहुसङ्कप्पं, यस्स नत्थि धुवं ठिति.

१४८. परिजिण्णमिदं रूपं, रोगनीळं [रोगनिड्ढं (सी. पी.), रोगनिद्धं (स्या.)] पभङ्गुरं;

भिज्जति पूतिसन्देहो, मरणन्तञ्हि जीवितं.

१४९. यानिमानि अपत्थानि [यानिमानि अपत्थानि (सी. स्या. पी.), यानिमानि’पविद्धानि (?)], अलाबूनेव [अलापूनेव (सी. स्या. पी.)] सारदे;

कापोतकानि अट्ठीनि, तानि दिस्वान का रति.

१५०. अट्ठीनं नगरं कतं, मंसलोहितलेपनं;

यत्थ जरा च मच्चु च, मानो मक्खो च ओहितो.

१५१. जीरन्ति वे राजरथा सुचित्ता, अथो सरीरम्पि जरं उपेति;

सतञ्च धम्मो न जरं उपेति, सन्तो हवे सब्भि पवेदयन्ति.

१५२. अप्पस्सुतायं पुरिसो, बलिबद्धोव [बलिवद्दोव (सी. स्या. पी.)] जीरति;

मंसानि तस्स वड्ढन्ति, पञ्ञा तस्स न वड्ढति.

१५३. अनेकजातिसंसारं, सन्धाविस्सं अनिब्बिसं;

गहकारं [गहकारकं (सी. स्या. पी.)] गवेसन्तो, दुक्खा जाति पुनप्पुनं.

१५४. गहकारक दिट्ठोसि, पुन गेहं न काहसि;

सब्बा ते फासुका भग्गा, गहकूटं विसङ्खतं;

विसङ्खारगतं चित्तं, तण्हानं खयमज्झगा.

१५५. अचरित्वा ब्रह्मचरियं, अलद्धा योब्बने धनं;

जिण्णकोञ्चाव झायन्ति, खीणमच्छेव पल्लले.

१५६. अचरित्वा ब्रह्मचरियं, अलद्धा योब्बने धनं;

सेन्ति चापातिखीणाव, पुराणानि अनुत्थुनं.

जरावग्गो एकादसमो निट्ठितो.