६. निमिराजचरिया

४०. ‘‘पुनापरं यदा होमि, मिथिलायं पुरुत्तमे;

निमि नाम महाराजा, पण्डितो कुसलत्थिको.

४१. ‘‘तदाहं मापयित्वान, चतुस्सालं चतुम्मुखं;

तत्थ दानं पवत्तेसिं, मिगपक्खिनरादिनं.

४२. ‘‘अच्छादनञ्च सयनं, अन्नं पानञ्च भोजनं;

अब्बोच्छिन्नं करित्वान, महादानं पवत्तयिं.

४३. ‘‘यथापि सेवको सामिं, धनहेतुमुपागतो;

कायेन वाचा मनसा, आराधनीयमेसति.

४४. ‘‘तथेवाहं सब्बभवे, परियेसिस्सामि बोधिजं;

दानेन सत्ते तप्पेत्वा, इच्छामि बोधिमुत्तम’’न्ति.

निमिराजचरियं छट्ठं.