९. बोधिसिञ्चकत्थेरअपदानं

४६. ‘‘विपस्सिस्स भगवतो, महाबोधिमहो अहु;

पब्बज्जुपगतो सन्तो, उपगच्छिं अहं तदा.

४७. ‘‘कुसुमोदकमादाय, बोधिया ओकिरिं अहं;

मोचयिस्सति नो मुत्तो, निब्बापेस्सति निब्बुतो.

४८. ‘‘एकनवुतितो कप्पे, यं बोधिमभिसिञ्चयिं;

दुग्गतिं नाभिजानामि, बोधिसिञ्चायिदं फलं.

४९. ‘‘तेत्तिंसे वत्तमानम्हि, कप्पे आसुं जनाधिपा;

उदकसेचना नाम, अट्ठेते चक्कवत्तिनो.

५०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बोधिसिञ्चको थेरो इमा गाथायो अभासित्थाति.

बोधिसिञ्चकत्थेरस्सापदानं नवमं.