१०. पदुमपुप्फियत्थेरअपदानं

५१. ‘‘पोक्खरवनं पविट्ठो, भञ्जन्तो पदुमानिहं;

तत्थद्दसं फुस्सं बुद्धं [अद्दसं फुस्ससम्बुद्धं (सी. स्या.)], बात्तिंसवरलक्खणं.

५२. ‘‘पदुमपुप्फं गहेत्वान, आकासे उक्खिपिं अहं;

पापकम्मं सरित्वान, पब्बजिं अनगारियं.

५३. ‘‘पब्बजित्वान कायेन, मनसा संवुतेन च;

वचीदुच्चरितं हित्वा, आजीवं परिसोधयिं.

५४. ‘‘द्वेनवुते इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

५५. ‘‘पदुमाभासनामा च, अट्ठारस महीपती;

अट्ठारसेसु कप्पेसु, अट्ठतालीसमासिसुं.

५६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पदुमपुप्फियो थेरो इमा गाथायो अभासित्थाति;

पदुमपुप्फियत्थेरस्सापदानं दसमं.

तिमिरवग्गो नवमो.