९. ठितञ्जलियत्थेरअपदानं

४२. ‘‘मिगलुद्दो पुरे आसिं, अरञ्ञे कानने अहं;

तत्थ अद्दसं [तत्थद्दसासिं (सी. स्या.)] सम्बुद्धं, बात्तिंसवरलक्खणं.

४३. ‘‘तत्थाहं अञ्जलिं कत्वा, पक्कामिं पाचिनामुखो;

अविदूरे निसिन्नस्स, नियके पण्णसन्थरे.

४४. ‘‘ततो मे असनीपातो, मत्थके निपती तदा;

सोहं मरणकालम्हि, अकासिं पुनरञ्जलिं.

४५. ‘‘द्वेनवुते इतो कप्पे, अञ्जलिं अकरिं तदा;

दुग्गतिं नाभिजानामि, अञ्जलिस्स इदं फलं.

४६. ‘‘चतुपण्णासकप्पम्हि, मिगकेतुसनामको;

सत्तरतनसम्पन्नो, चक्कवत्ती महब्बलो.

४७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा ठितञ्जलियो थेरो इमा गाथायो अभासित्थाति.

ठितञ्जलियत्थेरस्सापदानं नवमं.