७. सूचिदायकत्थेरअपदानं

३०. ‘‘तिंसकप्पसहस्सम्हि, सम्बुद्धो लोकनायको;

सुमेधो नाम नामेन, बात्तिंसवरलक्खणो.

३१. ‘‘तस्स कञ्चनवण्णस्स, द्विपदिन्दस्स तादिनो;

पञ्च सूची मया दिन्ना, सिब्बनत्थाय चीवरं.

३२. ‘‘तेनेव सूचिदानेन, निपुणत्थविपस्सकं;

तिक्खं लहुञ्च फासुञ्च, ञाणं मे उदपज्जथ.

३३. ‘‘किलेसा झापिता मय्हं, भवा सब्बे समूहता;

धारेमि अन्तिमं देहं, सम्मासम्बुद्धसासने.

३४. ‘‘द्विपदाधिपती नाम, राजानो चतुरो अहुं;

सत्तरतनसम्पन्ना, चक्कवत्ती महब्बला.

३५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सूचिदायको थेरो इमा गाथायो अभासित्थाति.

सूचिदायकत्थेरस्सापदानं सत्तमं.