९. सुमनत्थेरअपदानं

६२. ‘‘सुमनो नाम नामेन, मालाकारो अहं तदा;

अद्दसं विरजं बुद्धं, लोकाहुतिपटिग्गहं.

६३. ‘‘उभो हत्थेहि पग्गय्ह, सुमनं पुप्फमुत्तमं;

बुद्धस्स अभिरोपेसिं, सिखिनो लोकबन्धुनो.

६४. ‘‘इमाय पुप्फपूजाय, चेतनापणिधीहि च;

दुग्गतिं नाभिजानामि, बुद्धपूजायिदं फलं.

६५. ‘‘एकत्तिंसे इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं [पुप्फपूजायिदं (सी.)] फलं.

६६. ‘‘छब्बीसतिम्हि कप्पम्हि, चत्तारोसुं महायसा;

सत्तरतनसम्पन्ना, राजानो चक्कवत्तिनो.

६७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुमनो थेरो इमा गाथायो अभासित्थाति.

सुमनत्थेरस्सापदानं नवमं.