६. सुचिन्तितत्थेरअपदानं

३६. ‘‘गिरिदुग्गचरो आसिं, अभिजातोव केसरी;

मिगसङ्घं वधित्वान, जीवामि पब्बतन्तरे.

३७. ‘‘अत्थदस्सी तु भगवा, सब्बञ्ञू वदतं वरो;

ममुद्धरितुकामो सो, आगच्छि पब्बतुत्तमं.

३८. ‘‘पसदञ्च मिगं हन्त्वा, भक्खितुं समुपागमिं;

भगवा तम्हि समये, भिक्खमानो [सिक्खाचारो (स्या.)] उपागमि.

३९. ‘‘वरमंसानि पग्गय्ह, अदासिं तस्स सत्थुनो;

अनुमोदि महावीरो, निब्बापेन्तो ममं तदा.

४०. ‘‘तेन चित्तप्पसादेन, गिरिदुग्गं पविसिं अहं;

पीतिं उप्पादयित्वान, तत्थ कालङ्कतो अहं.

४१. ‘‘एतेन मंसदानेन, चित्तस्स पणिधीहि च;

पन्नरसे कप्पसते, देवलोके रमिं अहं.

४२. ‘‘अवसेसेसु कप्पेसु, कुसलं चिन्तितं [निचितं (सी.), करितं (स्या.)] मया;

तेनेव मंसदानेन, बुद्धानुस्सरणेन च.

४३. ‘‘अट्ठत्तिंसम्हि कप्पम्हि, अट्ठ दीघायुनामका;

सट्ठिम्हितो कप्पसते, दुवे वरुणनामका [सरणनामका (स्या.)].

४४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुचिन्तितो थेरो इमा गाथायो अभासित्थाति.

सुचिन्तितत्थेरस्सापदानं छट्ठं.