१०. असनबोधियत्थेरअपदानं

७८. ‘‘जातिया सत्तवस्सोहं, अद्दसं लोकनायकं;

पसन्नचित्तो सुमनो, उपगच्छिं नरुत्तमं.

७९. ‘‘तिस्सस्साहं भगवतो, लोकजेट्ठस्स तादिनो;

हट्ठो हट्ठेन चित्तेन, रोपयिं बोधिमुत्तमं.

८०. ‘‘असनो नामधेय्येन, धरणीरुहपादपो;

पञ्चवस्से परिचरिं, असनं बोधिमुत्तमं.

८१. ‘‘पुप्फितं पादपं दिस्वा, अब्भुतं लोमहंसनं;

सकं कम्मं पकित्तेन्तो, बुद्धसेट्ठं उपागमिं.

८२. ‘‘तिस्सो तदा सो सम्बुद्धो, सयम्भू अग्गपुग्गलो;

भिक्खुसङ्घे निसीदित्वा, इमा गाथा अभासथ.

८३. ‘‘‘येनायं रोपिता बोधि, बुद्धपूजा च सक्कता;

तमहं कित्तयिस्सामि, सुणाथ मम भासतो.

८४. ‘‘‘तिंसकप्पानि देवेसु, देवरज्जं करिस्सति;

चतुसट्ठि चक्खत्तुं सो, चक्कवत्ती भविस्सति.

८५. ‘‘‘तुसिता हि चवित्वान, सुक्कमूलेन चोदितो;

द्वे सम्पत्ती अनुभोत्वा, मनुस्सत्ते रमिस्सति.

८६. ‘‘‘पधानपहितत्तो सो, उपसन्तो निरूपधि;

सब्बासवे परिञ्ञाय, निब्बायिस्सतिनासवो’.

८७. ‘‘विवेकमनुयुत्तोहं, उपसन्तो निरूपधि;

नागोव बन्धनं छेत्वा, विहरामि अनासवो.

८८. ‘‘द्वेनवुते इतो कप्पे, बोधिं रोपेसहं तदा;

दुग्गतिं नाभिजानामि, बोधिरोपस्सिदं फलं.

८९. ‘‘चतुसत्ततितो कप्पे, दण्डसेनोति विस्सुतो;

सत्तरतनसम्पन्नो, चक्कवत्ती तदा अहुं.

९०. ‘‘तेसत्ततिम्हितो कप्पे, सत्ताहेसुं महीपती;

समन्तनेमिनामेन, राजानो चक्कवत्तिनो.

९१. ‘‘पण्णवीसतितो कप्पे, पुण्णको नाम खत्तियो;

सत्तरतनसम्पन्नो, चक्कवत्ती महब्बलो.

९२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा असनबोधियो थेरो इमा गाथायो अभासित्थाति.

असनबोधियत्थेरस्सापदानं दसमं.

बीजनिवग्गो छट्ठो.