७. कुटजपुप्फियत्थेरअपदानं

३७. ‘‘हिमवन्तस्साविदूरे, वसलो [चावलो (सी. पी.), अच्चयो (स्या.)] नाम पब्बतो;

बुद्धो सुदस्सनो नाम, वसते पब्बतन्तरे.

३८. ‘‘पुप्फं हेमवन्तं गय्ह, वेहासं अगमासहं;

तत्थद्दसासिं सम्बुद्धं, ओघतिण्णमनासवं.

३९. ‘‘पुप्फं कुटजमादाय, सिरे कत्वान अञ्जलिं [कत्वानहं तदा (स्या. पी. क.)];

बुद्धस्स अभिरोपेसिं, सयम्भुस्स महेसिनो.

४०. ‘‘एकतिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४१. ‘‘किलेसा झापिता मय्हं…पे… विहरामि अनासवो.

४२. ‘‘स्वागतं वत मे आसि…पे… कतं बुद्धस्स सासनं.

४३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कुटजपुप्फियो थेरो इमा गाथायो

अभासित्थाति.

कुटजपुप्फियत्थेरस्सापदानं सत्तमं.