१०. पदुमधारिकत्थेरअपदानं

७८. ‘‘हिमवन्तस्साविदूरे, रोमसो नाम पब्बतो;

बुद्धोपि सम्भवो नाम, अब्भोकासे वसी तदा.

७९. ‘‘भवना निक्खमित्वान, पदुमं धारयिं अहं;

एकाहं धारयित्वान, भवनं पुनरागमिं.

८०. ‘‘एकतिंसे इतो कप्पे, यं बुद्धमभिपूजयिं;

दुग्गतिं नाभिजानामि, बुद्धपूजायिदं फलं.

८१. ‘‘किलेसा झापिता मय्हं…पे… विहरामि अनासवो.

८२. ‘‘स्वागतं वत मे आसि…पे… कतं बुद्धस्स सासनं.

८३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पदुमधारिको थेरो इमा गाथायो

अभासित्थाति.

पदुमधारिकत्थेरस्सापदानं दसमं.

फलदायकवग्गो द्वेपञ्ञासमो.