७. अजेलिफलदायकत्थेरअपदानं

७४. ‘‘अज्जुनो [अजिनो (स्या.)] नाम सम्बुद्धो, हिमवन्ते वसी तदा;

चरणेन च सम्पन्नो, समाधिकुसलो मुनि.

७५. ‘‘कुम्भमत्तं गहेत्वान, अजेलिं [अञ्जलिं (स्या.), अजेलं (पी.)] जीवजीवकं;

छत्तपण्णं गहेत्वान, अदासिं सत्थुनो अहं.

७६. ‘‘चतुन्नवुतितो कप्पे, यं फलं अददिं तदा;

दुग्गतिं नाभिजानामि, फलदानस्सिदं फलं.

७७. ‘‘किलेसा झापिता मय्हं…पे… विहरामि अनासवो.

७८. ‘‘स्वागतं वत मे आसि…पे… कतं बुद्धस्स सासनं.

७९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अजेलिफलदायको थेरो इमा

गाथायो अभासित्थाति.

अजेलिफलदायकत्थेरस्सापदानं सत्तमं.