८. पुलिनथूपियत्थेरअपदानं

५७. ‘‘हिमवन्तस्साविदूरे, यमको नाम पब्बतो;

अस्समो सुकतो मय्हं, पण्णसाला सुमापिता.

५८. ‘‘नारदो नाम नामेन, जटिलो उग्गतापनो;

चतुद्दससहस्सानि, सिस्सा परिचरन्ति मं.

५९. ‘‘पटिसल्लीनको सन्तो, एवं चिन्तेसहं तदा;

‘सब्बो जनो मं पूजेति, नाहं पूजेमि किञ्चनं.

६०. ‘‘‘न मे ओवादको अत्थि, वत्ता कोचि न विज्जति;

अनाचरियुपज्झायो, वने वासं उपेमहं.

६१. ‘‘‘उपासमानो यमहं, गरुचित्तं उपट्ठहे;

सो मे आचरियो नत्थि, वनवासो निरत्थको.

६२. ‘‘‘आयागं मे गवेसिस्सं, गरुं भावनियं तथा;

सावस्सयो वसिस्सामि, न कोचि गरहिस्सति’.

६३. ‘‘उत्तानकूला नदिका, सुपतित्था मनोरमा;

संसुद्धपुलिनाकिण्णा, अविदूरे ममस्समं.

६४. ‘‘नदिं अमरिकं नाम, उपगन्त्वानहं तदा;

संवड्ढयित्वा पुलिनं, अकं पुलिनचेतियं.

६५. ‘‘ये ते अहेसुं सम्बुद्धा, भवन्तकरणा मुनी;

तेसं एतादिसो थूपो, तं निमित्तं करोमहं.

६६. ‘‘करित्वा पुलिनं [पुळिने (सी. स्या. पी.)] थूपं, सोवण्णं मापयिं अहं;

सोण्णकिङ्कणिपुप्फानि, सहस्से तीणि पूजयिं.

६७. ‘‘सायपातं नमस्सामि, वेदजातो कतञ्जली;

सम्मुखा विय सम्बुद्धं, वन्दिं पुलिनचेतियं.

६८. ‘‘यदा किलेसा जायन्ति, वितक्का गेहनिस्सिता;

सरामि सुकतं थूपं, पच्चवेक्खामि तावदे.

६९. ‘‘उपनिस्साय विहरं, सत्थवाहं विनायकं;

किलेसे संवसेय्यासि, न युत्तं तव मारिस.

७०. ‘‘सह आवज्जिते थूपे, गारवं होति मे तदा;

कुवितक्के विनोदेसिं, नागो तुत्तट्टितो यथा.

७१. ‘‘एवं विहरमानं मं, मच्चुराजाभिमद्दथ;

तत्थ कालङ्कतो सन्तो, ब्रह्मलोकमगच्छहं.

७२. ‘‘यावतायुं वसित्वान, तिदिवे [तिदसे (सी. पी.)] उपपज्जहं;

असीतिक्खत्तुं देविन्दो, देवरज्जमकारयिं.

७३. ‘‘सतानं तीणिक्खत्तुञ्च, चक्कवत्ती अहोसहं;

पदेसरज्जं विपुलं, गणनातो असङ्खियं.

७४. ‘‘सोण्णकिङ्कणिपुप्फानं [तेसं किङ्कणिपुप्फानं (सी.)], विपाकं अनुभोमहं;

धातीसतसहस्सानि, परिवारेन्ति मं [मे (क.)] भवे.

७५. ‘‘थूपस्स परिचिण्णत्ता, रजोजल्लं न लिम्पति;

गत्ते सेदा न मुच्चन्ति, सुप्पभासो भवामहं.

७६. ‘‘अहो मे सुकतो थूपो, सुदिट्ठामरिका नदी;

थूपं कत्वान पुलिनं, पत्तोम्हि अचलं पदं.

७७. ‘‘कुसलं कत्तुकामेन, जन्तुना सारगाहिना;

नत्थि खेत्तं अखेत्तं वा, पटिपत्तीव साधका [सारिका (पी.), सारका (स्या.), सारता (क.)].

७८. ‘‘यथापि बलवा पोसो, अण्णवं तरितुस्सहे;

परित्तं कट्ठमादाय, पक्खन्देय्य महासरं.

७९. ‘‘इमाहं कट्ठं निस्साय, तरिस्सामि महोदधिं;

उस्साहेन वीरियेन, तरेय्य उदधिं नरो.

८०. ‘‘तथेव मे कतं कम्मं, परित्तं थोककञ्च यं;

तं कम्मं उपनिस्साय, संसारं समतिक्कमिं.

८१. ‘‘पच्छिमे भवे सम्पत्ते, सुक्कमूलेन चोदितो;

सावत्थियं पुरे जातो, महासाले सुअड्ढके.

८२. ‘‘सद्धा माता पिता मय्हं, बुद्धस्स सरणं गता;

उभो दिट्ठपदा एते, अनुवत्तन्ति सासनं.

८३. ‘‘बोधिपपटिकं गय्ह, सोण्णथूपमकारयुं;

सायपातं [सायं पातं (स्या. क.)] नमस्सन्ति, सक्यपुत्तस्स सम्मुखा.

८४. ‘‘उपोसथम्हि दिवसे, सोण्णथूपं विनीहरुं;

बुद्धस्स वण्णं कित्तेन्ता, तियामं वीतिनामयुं.

८५. ‘‘सह दिस्वानहं [पसादेत्वानहं (क.)] थूपं, सरिं पुलिनचेतियं;

एकासने निसीदित्वा, अरहत्तमपापुणिं.

द्वावीसतिमं भाणवारं.

८६. ‘‘गवेसमानो तं वीरं, धम्मसेनापतिद्दसं;

अगारा निक्खमित्वान, पब्बजिं तस्स सन्तिके.

८७. ‘‘जातिया सत्तवस्सेन, अरहत्तमपापुणिं;

उपसम्पादयी बुद्धो, गुणमञ्ञाय चक्खुमा.

८८. ‘‘दारकेनेव सन्तेन, किरियं निट्ठितं मया;

कतं मे करणीयज्ज, सक्यपुत्तस्स सासने.

८९. ‘‘सब्बवेरभयातीतो, सब्बसङ्गातिगो [सब्बसङ्कातितो (क.)] इसि;

सावको ते महावीर, सोण्णथूपस्सिदं फलं.

९०. ‘‘किलेसा झापिता मय्हं…पे… विहरामि अनासवो.

९१. ‘‘स्वागतं वत मे आसि…पे… कतं बुद्धस्स सासनं.

९२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पुलिनथूपियो थेरो इमा गाथायो

अभासित्थाति.

पुलिनथूपियत्थेरस्सापदानं अट्ठमं.