६. पदुमच्छदनियत्थेरअपदानं

८३. ‘‘निब्बुते लोकनाथम्हि, विपस्सिम्हग्गपुग्गले;

सुफुल्लपदुमं गय्ह, चितमारोपयिं अहं.

८४. ‘‘आरोपिते च चितके, वेहासं नभमुग्गमि;

आकासे छदनं [आकासच्छदनं (सी.)] कत्वा, चितकम्हि अधारयि.

८५. ‘‘एकनवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

८६. ‘‘सत्ततालीसितो कप्पे, पदुमिस्सरनामको;

चातुरन्तो विजितावी, चक्कवत्ती महब्बलो.

८७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पदुमच्छदनियो थेरो इमा गाथायो अभासित्थाति;

पदुमच्छदनियत्थेरस्सापदानं छट्ठं.