५. उच्छुखण्डिकत्थेरअपदानं

४४. ‘‘नगरे बन्धुमतिया, द्वारपालो अहोसहं;

अद्दसं विरजं बुद्धं, सब्बधम्मान पारगुं.

४५. ‘‘उच्छुखण्डिकमादाय, बुद्धसेट्ठस्सदासहं;

पसन्नचित्तो सुमनो, विपस्सिस्स महेसिनो.

४६. ‘‘एकनवुतितो कप्पे, यं उच्छुमददिं तदा;

दुग्गतिं नाभिजानामि, उच्छुखण्डस्सिदं फलं.

४७. ‘‘किलेसा झापिता मय्हं…पे… विहरामि अनासवो.

४८. ‘‘स्वागतं वत मे आसि…पे… कतं बुद्धस्स सासनं.

४९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उच्छुखण्डिको थेरो इमा गाथायो

अभासित्थाति.

उच्छुखण्डिकत्थेरस्सापदानं पञ्चमं.