१. भद्दालित्थेरअपदानं

१. ‘‘सुमेधो नाम सम्बुद्धो, अग्गो कारुणिको मुनि;

विवेककामो लोकग्गो, हिमवन्तमुपागमि.

२. ‘‘अज्झोगाहेत्वा हिमवं, सुमेधो लोकनायको;

पल्लङ्कं आभुजित्वान, निसीदि पुरिसुत्तमो.

३. ‘‘समाधिं सो समापन्नो, सुमेधो लोकनायको;

सत्तरत्तिन्दिवं बुद्धो, निसीदि पुरिसुत्तमो.

४. ‘‘खारिभारं [खारिकाजं (सी.)] गहेत्वान, वनमज्झोगहिं अहं;

तत्थद्दसासिं सम्बुद्धं, ओघतिण्णमनासवं.

५. ‘‘सम्मज्जनिं गहेत्वान, सम्मज्जित्वान अस्समं;

चतुदण्डे ठपेत्वान, अकासिं मण्डपं तदा.

६. ‘‘सालपुप्फं आहरित्वा, मण्डपं छादयिं अहं;

पसन्नचित्तो सुमनो, अभिवन्दिं तथागतं.

७. ‘‘यं वदन्ति सुमेधोति, भूरिपञ्ञं सुमेधसं;

भिक्खुसङ्घे निसीदित्वा, इमा गाथा अभासथ.

८. ‘‘‘बुद्धस्स गिरमञ्ञाय, सब्बे देवा समागमुं;

असंसयं बुद्धसेट्ठो, धम्मं देसेति चक्खुमा.

९. ‘‘‘सुमेधो नाम सम्बुद्धो, आहुतीनं पटिग्गहो;

देवसङ्घे निसीदित्वा, इमा गाथा अभासथ.

१०. ‘‘‘यो मे सत्ताहं मण्डपं, धारयी सालछादितं;

तमहं कित्तयिस्सामि, सुणाथ मम भासतो.

११. ‘‘‘देवभूतो मनुस्सो वा, हेमवण्णो भविस्सति;

पहूतभोगो हुत्वान, कामभोगी भविस्सति.

१२. ‘‘‘सट्ठि नागसहस्सानि, सब्बालङ्कारभूसिता;

सुवण्णकच्छा मातङ्गा, हेमकप्पनवाससा.

१३. ‘‘‘आरूळ्हा गामणीयेहि, तोमरङ्कुसपाणिभि;

सायं पातो [सायपातो (पी.)] उपट्ठानं, आगमिस्सन्तिमं नरं;

तेहि नागेहि परिवुतो, रमिस्सति अयं नरो.

१४. ‘‘‘सट्ठि अस्ससहस्सानि, सब्बालङ्कारभूसिता;

आजानीयाव जातिया, सिन्धवा सीघवाहिनो.

१५. ‘‘‘आरूळ्हा गामणीयेहि, इल्लियाचापधारिभि;

परिवारेस्सन्तिमं निच्चं, बुद्धपूजायिदं फलं.

१६. ‘‘‘सट्ठि रथसहस्सानि, सब्बालङ्कारभूसिता;

दीपा अथोपि वेयग्घा, सन्नद्धा उस्सितद्धजा.

१७. ‘‘‘आरूळ्हा गामणीयेहि, चापहत्थेहि वम्मिभि;

परिवारेस्सन्तिमं निच्चं, बुद्धपूजायिदं फलं.

१८. ‘‘‘सट्ठि गामसहस्सानि, परिपुण्णानि सब्बसो;

पहूतधनधञ्ञानि, सुसमिद्धानि सब्बसो;

सदा पातुभविस्सन्ति, बुद्धपूजायिदं फलं.

१९. ‘‘‘हत्थी अस्सा रथा पत्ती, सेना च चतुरङ्गिनी;

परिवारेस्सन्तिमं निच्चं, बुद्धपूजायिदं फलं.

२०. ‘‘‘अट्ठारसे कप्पसते, देवलोके रमिस्सति;

सहस्सक्खत्तुं राजा च, चक्कवत्ती भविस्सति.

२१. ‘‘‘सतानं तीणिक्खत्तुञ्च, देवरज्जं करिस्सति;

पदेसरज्जं विपुलं, गणनातो असङ्खियं.

२२. ‘‘‘तिंसकप्पसहस्सम्हि, ओक्काककुलसम्भवो;

गोतमो नाम गोत्तेन, सत्था लोके भविस्सति.

२३. ‘‘‘तस्स धम्मेसु दायादो, ओरसो धम्मनिम्मितो;

सब्बासवे परिञ्ञाय, विहरिस्सतिनासवो’.

२४. ‘‘तिंसकप्पसहस्सम्हि, अद्दसं लोकनायकं;

एत्थन्तरमुपादाय, गवेसिं अमतं पदं.

२५. ‘‘लाभा मय्हं सुलद्धं मे, यमहञ्ञासि सासनं;

तिस्सो विज्जा अनुप्पत्ता, कतं बुद्धस्स सासनं.

२६. ‘‘नमो ते पुरिसाजञ्ञ, नमो ते पुरिसुत्तम;

तव ञाणं पकित्तेत्वा, पत्तोम्हि अचलं पदं.

२७. ‘‘यं यं योनुपपज्जामि, देवत्तं अथ मानुसं;

सब्बत्थ सुखितो होमि, फलं मे ञाणकित्तने.

२८. ‘‘इदं पच्छिमकं मय्हं, चरिमो वत्तते भवो;

नागोव बन्धनं छेत्वा, विहरामि अनासवो.

२९. ‘‘किलेसा झापिता मय्हं, भवा सब्बे समूहता;

नागोव बन्धनं छेत्वा, विहरामि अनासवो.

३०. ‘‘स्वागतं वत मे आसि, मम बुद्धस्स सन्तिके;

तिस्सो विज्जा अनुप्पत्ता, कतं बुद्धस्स सासनं.

३१. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा भद्दालित्थेरो इमा गाथायो अभासित्थाति.

भद्दालित्थेरस्सापदानं पठमं.