१०. अजितत्थेरअपदानं

४८४. ‘‘पदुमुत्तरो नाम जिनो, सब्बधम्मान पारगू;

अज्झोगाहेत्वा हिमवन्तं, निसीदि लोकनायको.

४८५. ‘‘नाहं अद्दक्खिं [पस्सामि (?)] सम्बुद्धं, नपि सद्दं सुणोमहं;

मम भक्खं गवेसन्तो, आहिण्डामि वने अहं [तदा (सी.)].

४८६. ‘‘तत्थद्दस्सासिं सम्बुद्धं, द्वत्तिंसवरलक्खणं;

दिस्वान वित्तिमापज्जिं [चित्तमापज्जि (सी.), चित्तमापज्जिं (स्या.)], सत्तो को नामयं भवे.

४८७. ‘‘लक्खणानि विलोकेत्वा, मम विज्जं अनुस्सरिं;

सुतञ्हि मेतं वुड्ढानं, पण्डितानं सुभासितं.

४८८. ‘‘तेसं यथा तं वचनं, अयं बुद्धो भविस्सति;

यंनूनाहं सक्करेय्यं, गतिं मे सोधयिस्सति.

४८९. ‘‘खिप्पं अस्सममागन्त्वा, मधुतेलं गहिं अहं;

कोलम्बकं गहेत्वान, उपगच्छिं विनायकं [नरासभं (सी.)].

४९०. ‘‘तिदण्डके गहेत्वान, अब्भोकासे ठपेसहं;

पदीपं पज्जलित्वान, अट्ठक्खत्तुं अवन्दहं.

४९१. ‘‘सत्तरत्तिन्दिवं बुद्धो, निसीदि पुरिसुत्तमो;

ततो रत्या विवसाने, वुट्ठासि लोकनायको.

४९२. ‘‘पसन्नचित्तो सुमनो, सब्बरत्तिन्दिवं अहं;

दीपं बुद्धस्स पादासिं, पसन्नो सेहि पाणिभि.

४९३. ‘‘सब्बे वना गन्धमया, पब्बते गन्धमादने;

बुद्धस्स आनुभावेन, आगच्छुं बुद्धसन्तिकं [उपगच्छुं तदा जिनं (सी.)].

४९४. ‘‘ये केचि पुप्फगन्धासे, पुप्फिता धरणीरुहा;

बुद्धस्स आनुभावेन, सब्बे सन्निपतुं तदा.

४९५. ‘‘यावता हिमवन्तम्हि, नागा च गरुळा उभो;

धम्मञ्च सोतुकामा ते, आगच्छुं बुद्धसन्तिकं.

४९६. ‘‘देवलो नाम समणो, बुद्धस्स अग्गसावको;

वसीसतसहस्सेहि, बुद्धसन्तिकुपागमि.

४९७. ‘‘पदुमुत्तरो लोकविदू, आहुतीनं पटिग्गहो;

भिक्खुसङ्घे निसीदित्वा, इमा गाथा अभासथ.

४९८. ‘‘‘यो मे दीपं पदीपेसि, पसन्नो सेहि पाणिभि;

तमहं कित्तयिस्सामि, सुणाथ मम भासतो.

४९९. ‘‘‘सट्ठि कप्पसहस्सानि, देवलोके रमिस्सति;

सहस्सक्खत्तुं राजा च, चक्कवत्ती भविस्सति.

सोळसमं भाणवारं.

५००. ‘‘‘छत्तिसक्खत्तुं देविन्दो, देवरज्जं करिस्सति;

पथवियं सत्तसतं, विपुलं रज्जं करिस्सति.

५०१. ‘‘‘पदेसरज्जं विपुलं, गणनातो असङ्खियं;

इमिना दीपदानेन, दिब्बचक्खु भविस्सति.

५०२. ‘‘‘समन्ततो अट्ठकोसं [अड्ढकोसं (सी. स्या.)], पस्सिस्सति अयं सदा;

देवलोका चवन्तस्स, निब्बत्तन्तस्स जन्तुनो.

५०३. ‘‘‘दिवा वा यदि वा रत्तिं, पदीपं धारयिस्सति;

जायमानस्स सत्तस्स, पुञ्ञकम्मसमङ्गिनो.

५०४. ‘‘‘यावता नगरं आसि, तावता जोतयिस्सति;

उपपज्जति यं योनिं, देवत्तं अथ मानुसं.

५०५. ‘‘‘अस्सेव दीपदानस्स, [अट्ठदीपफलेन हि; उपट्ठिस्सन्तिमं जन्तुं (स्या.), अट्ठ दीपा फलेन हि; न जहिस्सन्ति’मं जन्तुं (?)] अट्ठदीपफलेन हि;

न जयिस्सन्तिमं जन्तू [अट्ठदीपफलेन हि; उपट्ठिस्सन्तिमं जन्तुं (स्या.), अट्ठ दीपा फलेन हि; न जहिस्सन्ति’मं जन्तुं (?)], दीपदानस्सिदं फलं.

५०६. ‘‘‘कप्पसतसहस्सम्हि, ओक्काककुलसम्भवो;

गोतमो नाम गोत्तेन, सत्था लोके भविस्सति.

५०७. ‘‘‘तस्स धम्मेसु दायादो, ओरसो धम्मनिम्मितो;

सब्बासवे परिञ्ञाय, निब्बायिस्सतिनासवो.

५०८. ‘‘‘तोसयित्वान सम्बुद्धं, गोतमं सक्यपुङ्गवं;

अजितो नाम नामेन, हेस्सति सत्थु सावको’.

५०९. ‘‘सट्ठि कप्पसहस्सानि, देवलोके रमिं अहं;

तत्रापि मे दीपसतं, जोतते निच्चकालिकं [सब्बकालिकं (सी.)].

५१०. ‘‘देवलोके मनुस्से वा, निद्धावन्ति पभा मम;

बुद्धसेट्ठं सरित्वान, भिय्यो हासं जनेसहं.

५११. ‘‘तुसिताहं चवित्वान, ओक्कमिं मातुकुच्छियं;

जायमानस्स सन्तस्स, आलोको विपुलो अहु.

५१२. ‘‘अगारा अभिनिक्खम्म, पब्बजिं अनगारियं;

बावरिं उपसङ्कम्म, सिस्सत्तं अज्झुपागमिं.

५१३. ‘‘हिमवन्ते वसन्तोहं, अस्सोसिं लोकनायकं;

उत्तमत्थं गवेसन्तो, उपगच्छिं विनायकं.

५१४. ‘‘दन्तो बुद्धो दमेतावी, ओघतिण्णो निरूपधि;

निब्बानं कथयी बुद्धो, सब्बदुक्खप्पमोचनं.

५१५. ‘‘तं मे आगमनं सिद्धं, तोसितोहं महामुनिं;

तिस्सो विज्जा अनुप्पत्ता, कतं बुद्धस्स सासनं.

५१६. ‘‘सतसहस्सितो कप्पे, यं दीपमददिं तदा;

दुग्गतिं नाभिजानामि, दीपदानस्सिदं फलं.

५१७. ‘‘किलेसा झापिता मय्हं…पे… विहरामि अनासवो.

५१८. ‘‘स्वागतं वत मे आसि…पे… कतं बुद्धस्स सासनं.

५१९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अजितो थेरो इमा गाथायो अभासित्थाति.

अजितत्थेरस्सापदानं दसमं.

पिलिन्दवच्छवग्गो चत्तालीसमो.

तस्सुद्दानं –

पिलिन्दवच्छो सेलो च, सब्बकित्ती मधुंददो;

कूटागारी बाकुलो च, गिरि सळलसव्हयो.

सब्बदो अजितो चेव, गाथायो गणिता इह;

सतानि पञ्च गाथानं, वीसति च तदुत्तरीति.

अथ वग्गुद्दानं –

पदुमारक्खदो चेव, उमा गन्धोदकेन च;

एकपद्म सद्दसञ्ञी, मन्दारं बोधिवन्दको.

अवटञ्च पिलिन्दि [एवमेव दिस्सति] च, गाथायो गणिता इह;

चतुसत्तति गाथायो, एकादस सतानि च.

पदुमवग्गदसकं.