२. पाटलिपुप्फियत्थेरअपदानं

६. ‘‘विपस्सी नाम भगवा, सयम्भू अग्गपुग्गलो;

पुरक्खतो ससिस्सेहि, पाविसि बन्धुमं जिनो.

७. ‘‘तीणि पाटलिपुप्फानि, उच्छङ्गे ठपितानि मे;

सीसं न्हायितुकामोव, नदीतित्थं अगच्छहं.

८. ‘‘निक्खम्म बन्धुमतिया, अद्दसं लोकनायकं;

इन्दीवरंव जलितं, आदित्तंव हुतासनं.

९. ‘‘ब्यग्घूसभंव पवरं, अभिजातंव केसरिं;

गच्छन्तं समणानग्गं, भिक्खुसङ्घपुरक्खतं.

१०. ‘‘तस्मिं पसन्नो [समणे (क.)] सुगते, किलेसमलधोवने;

गहेत्वा तीणि पुप्फानि, बुद्धसेट्ठं अपूजयिं.

११. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

१२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पाटलिपुप्फियो थेरो इमा गाथायो अभासित्थाति.

पाटलिपुप्फियत्थेरस्सापदानं दुतियं.