४. केसरपुप्फियत्थेरअपदानं

१२. ‘‘विज्जाधरो तदा आसिं, हिमवन्तम्हि पब्बते;

अद्दसं विरजं बुद्धं, चङ्कमन्तं महायसं.

१३. ‘‘तीणि केसरपुप्फानि [केसरिपुप्फानि (सी.)], सीसे कत्वानहं तदा;

उपसङ्कम्म सम्बुद्धं, वेस्सभुं अभिपूजयिं.

१४. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, बुद्धपूजायिदं फलं.

१५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा केसरपुप्फियो थेरो इमा गाथायो अभासित्थाति.

केसरपुप्फियत्थेरस्सापदानं चतुत्थं.