१. मन्दारवपुप्फियत्थेरअपदानं

१. ‘‘तावतिंसा इधागन्त्वा, मङ्गलो नाम माणवो;

मन्दारवं गहेत्वान, विपस्सिस्स महेसिनो.

२. ‘‘समाधिना निसिन्नस्स, मत्थके धारयिं अहं;

सत्ताहं धारयित्वान, देवलोकं पुनागमिं.

३. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा मन्दारवपुप्फियो थेरो इमा गाथायो अभासित्थाति.

मन्दारवपुप्फियत्थेरस्सापदानं पठमं.