९. तिन्दुकफलदायकत्थेरअपदानं

५९. ‘‘कणिकारंव जोतन्तं, निसिन्नं पब्बतन्तरे;

अद्दसं विरजं बुद्धं, ओघतिण्णमनासवं.

६०. ‘‘तिन्दुकं सफलं दिस्वा, भिन्दित्वान सकोसकं [सकोटकं (सी.), सकोटिकं (स्या.)];

पसन्नचित्तो सुमनो, सयम्भुस्स मदासहं [वेस्सभुस्स अदासहं (सी.)].

६१. ‘‘एकनवुतितो कप्पे, यं फलमददिं तदा;

दुग्गतिं नाभिजानामि, फलदानस्सिदं फलं.

६२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तिन्दुकफलदायको थेरो इमा गाथायो अभासित्थाति.

तिन्दुकफलदायकत्थेरस्सापदानं नवमं.