१. गन्धधूपियत्थेरअपदानं

१. ‘‘सिद्धत्थस्स भगवतो, गन्धधूपं अदासहं;

सुमनेहि पटिच्छन्नं, बुद्धानुच्छविकञ्च तं.

२. ‘‘कञ्चनग्घियसङ्कासं, बुद्धं लोकग्गनायकं;

इन्दीवरंव जलितं, आदित्तंव हुतासनं.

३. ‘‘ब्यग्घुसभंव पवरं, अभिजातंव केसरिं;

निसिन्नं समणानग्गं, भिक्खुसङ्घपुरक्खतं.

४. ‘‘दिस्वा चित्तं पसादेत्वा, पग्गहेत्वान अञ्जलिं;

वन्दित्वा सत्थुनो पादे, पक्कामिं उत्तरामुखो.

५. ‘‘चतुन्नवुतितो कप्पे, यं गन्धमददिं तदा;

दुग्गतिं नाभिजानामि, गन्धपूजायिदं फलं.

६. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा गन्धधूपियो थेरो इमा गाथायो अभासित्थाति.

गन्धधूपियत्थेरस्सापदानं पठमं.