७. सद्दसञ्ञकत्थेरअपदानं

३४. ‘‘सुदस्सनो महावीरो, देसेति अमतं पदं;

परिवुतो सावकेहि, वसति घरमुत्तमे.

३५. ‘‘ताय वाचाय मधुराय, सङ्गण्हाति [सङ्गण्हन्ते (सी.)] महाजनं;

घोसो च विपुलो आसि, आसीसो [आसंसो (सी.)] देवमानुसे.

३६. ‘‘निग्घोससद्दं सुत्वान, सिद्धत्थस्स महेसिनो;

सद्दे चित्तं पसादेत्वा, अवन्दिं लोकनायकं.

३७. ‘‘चतुन्नवुतितो कप्पे, यं सञ्ञमलभिं तदा;

दुग्गतिं नाभिजानामि, बुद्धसञ्ञायिदं फलं.

३८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सद्दसञ्ञको थेरो इमा गाथायो अभासित्थाति.

सद्दसञ्ञकत्थेरस्सापदानं सत्तमं.