१०. कुमुदमालियत्थेरअपदानं

५४. ‘‘उसभं पवरं वीरं, महेसिं विजिताविनं;

विपस्सिनं महावीरं, अभिजातंव केसरिं.

५५. ‘‘रथियं पटिपज्जन्तं, आहुतीनं पटिग्गहं;

गहेत्वा कुमुदं मालं, बुद्धसेट्ठं समोकिरिं.

५६. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

५७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कुमुदमालियो थेरो इमा गाथायो अभासित्थाति.

कुमुदमालियत्थेरस्सापदानं दसमं.

आरक्खदायकवग्गो बात्तिंसतिमो [बत्तिंसतिमो (सी. स्या.)].