१. पदुमकेसरियत्थेरअपदानं

१. ‘‘इसिसङ्घे अहं पुब्बे, आसिं मातङ्गवारणो;

महेसीनं पसादेन, पद्मकेसरमोकिरिं.

२. ‘‘पच्चेकजिनसेट्ठेसु, धुतरागेसु तादिसु;

तेसु चित्तं पसादेत्वा, कप्पं सग्गम्हि मोदहं.

३. ‘‘एकनवुतितो कप्पे, केसरं ओकिरिं तदा;

दुग्गतिं नाभिजानामि, बुद्धपूजायिदं फलं.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा पदुमकेसरियो थेरो इमा गाथायो अभासित्थाति.

पदुमकेसरियत्थेरस्सापदानं पठमं.