५. गोसीसनिक्खेपकत्थेरअपदानं

२१. ‘‘आरामद्वारा निक्खम्म, गोसीसं सन्थतं मया;

अनुभोमि सकं कम्मं, पुब्बकम्मस्सिदं फलं.

२२. ‘‘आजानिया वातजवा, सिन्धवा सीघवाहना;

अनुभोमि सब्बमेतं, गोसीसस्स इदं फलं.

२३. ‘‘अहो कारं परमकारं, सुखत्ते सुकतं मया;

सङ्घे कतस्स कारस्स, न अञ्ञं कलमग्घति.

२४. ‘‘चतुन्नवुतितो कप्पे, यं सीसं सन्थरिं अहं;

दुग्गतिं नाभिजानामि, सन्थरस्स इदं फलं.

२५. ‘‘पञ्चसत्ततिकप्पम्हि, सुप्पतिट्ठितनामको;

एको आसिं महातेजो, चक्कवत्ती महब्बलो.

२६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा गोसीसनिक्खेपको थेरो इमा गाथायो अभासित्थाति.

गोसीसनिक्खेपकत्थेरस्सापदानं पञ्चमं.