२. पुप्फधारकत्थेरअपदानं

६. ‘‘वाकचीरधरो आसिं, अजिनुत्तरवासनो;

अभिञ्ञा पञ्च निब्बत्ता, चन्दस्स परिमज्जको.

७. ‘‘विपस्सिं लोकपज्जोतं, दिस्वा अभिगतं ममं;

पारिच्छत्तकपुप्फानि, धारेसिं सत्थुनो अहं.

८. ‘‘एकनवुतितो कप्पे, यं पुप्फमभिपूजयिं;

दुग्गतिं नाभिजानामि, धारणाय इदं फलं.

९. ‘‘सत्तासीतिम्हितो कप्पे, एको आसिं महीपति;

समन्तधारणो नाम, चक्कवत्ती महब्बलो.

१०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पुप्फधारको थेरो इमा गाथायो अभासित्थाति.

पुप्फधारकत्थेरस्सापदानं दुतियं.