१. चितकपूजकत्थेरअपदानं

१. ‘‘अजितो नाम नामेन, अहोसिं ब्राह्मणो तदा;

आहुतिं यिट्ठुकामोहं, नानापुप्फं समानयिं.

२. ‘‘जलन्तं चितकं दिस्वा, सिखिनो लोकबन्धुनो;

तञ्च पुप्फं समानेत्वा, चितके ओकिरिं अहं.

३. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४. ‘‘सत्तवीसे [सत्ततिंसे (क.)] इतो कप्पे, सत्तासुं मनुजाधिपा;

सुपज्जलितनामा ते, चक्कवत्ती महब्बला.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा चितकपूजको थेरो इमा गाथायो अभासित्थाति.

चितकपूजकत्थेरस्सापदानं पठमं.