४. पञ्चसीलसमादानियत्थेरअपदानं

१३४. ‘‘नगरे चन्दवतिया, भतको आसहं तदा;

परकम्मायने युत्तो, पब्बज्जं न लभामहं.

१३५. ‘‘महन्धकारपिहिता, तिविधग्गीहि डय्हरे;

केन नु खो उपायेन, विसंयुत्तो भवे अहं.

१३६. ‘‘देय्यधम्मो च मे नत्थि, वराको भतको अहं;

यंनूनाहं पञ्चसीलं, रक्खेय्यं परिपूरयं.

१३७. ‘‘अनोमदस्सिस्स मुनिनो, निसभो नाम सावको;

तमहं उपसङ्कम्म, पञ्चसिक्खापदग्गहिं.

१३८. ‘‘वस्ससतसहस्सानि, आयु विज्जति तावदे;

तावता पञ्चसीलानि, परिपुण्णानि गोपयिं.

१३९. ‘‘मच्चुकाले च सम्पत्ते, देवा अस्सासयन्ति मं;

‘रथो सहस्सयुत्तो ते, मारिसायं [मारिसस्स (क.)] उपट्ठितो’.

१४०. ‘‘वत्तन्ते चरिमे चित्ते, मम सीलं अनुस्सरिं;

तेन कम्मेन सुकतेन, तावतिंसं अगच्छहं.

१४१. ‘‘तिंसक्खत्तुञ्च देविन्दो, देवरज्जमकारयिं;

दिब्बसुखं [दिब्बं सुखं (सी.)] अनुभविं, अच्छराहि पुरक्खतो.

१४२. ‘‘पञ्चसत्ततिक्खत्तुञ्च, चक्कवत्ती अहोसहं;

पदेसरज्जं विपुलं, गणनातो असङ्खियं.

१४३. ‘‘देवलोका चवित्वान, सुक्कमूलेन चोदितो;

पुरे वेसालियं जातो, महासाले सुअड्ढके.

१४४. ‘‘वस्सूपनायिके काले, दिप्पन्ते [दिब्बन्ति (क.)] जिनसासने;

माता च मे पिता चेव, पञ्चसिक्खापदग्गहुं.

१४५. ‘‘सह सुत्वानहं सीलं, मम सीलं अनुस्सरिं;

एकासने निसीदित्वा, अरहत्तमपापुणिं.

१४६. ‘‘जातिया पञ्चवस्सेन, अरहत्तमपापुणिं;

उपसम्पादयि बुद्धो, गुणमञ्ञाय चक्खुमा.

१४७. ‘‘परिपुण्णानि गोपेत्वा, पञ्चसिक्खापदानहं;

अपरिमेय्ये इतो कप्पे, विनिपातं न गच्छहं.

१४८. ‘‘स्वाहं यसमनुभविं, तेसं सीलान वाहसा;

कप्पकोटिम्पि कित्तेन्तो, कित्तये एकदेसकं.

१४९. ‘‘पञ्चसीलानि गोपेत्वा, तयो हेतू लभामहं;

दीघायुको महाभोगो, तिक्खपञ्ञो भवामहं.

१५०. ‘‘संकित्तेन्तो च [पकित्तेन्तोव (सी.), पकित्तेन्ते च (स्या.)] सब्बेसं, अभिमत्तञ्च पोरिसं;

भवाभवे संसरित्वा, एते ठाने लभामहं.

१५१. ‘‘अपरिमेय्यसीलेसु, वत्तन्ता जिनसावका;

भवेसु यदि रज्जेय्युं, विपाको कीदिसो भवे.

१५२. ‘‘सुचिण्णं मे पञ्चसीलं, भतकेन तपस्सिना [विपस्सिना (सी.)];

तेन सीलेनहं अज्ज, मोचयिं सब्बबन्धना.

१५३. ‘‘अपरिमेय्ये इतो कप्पे, पञ्चसीलानि गोपयिं;

दुग्गतिं नाभिजानामि, पञ्चसीलानिदं फलं.

१५४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा पञ्चसीलसमादानियो थेरो इमा गाथायो अभासित्थाति.

पञ्चसीलसमादानियत्थेरस्सापदानं चतुत्थं.