३. तिसरणगमनियत्थेरअपदानं

१०६. ‘‘नगरे चन्दवतिया [बन्धुमतिया (अट्ठ.)], मातुउपट्ठाको [मातुपट्ठायको (सी.), मातुपट्ठानको (स्या.)] अहुं;

अन्धा माता पिता मय्हं, ते पोसेमि अहं तदा.

१०७. ‘‘रहोगतो निसीदित्वा, एवं चिन्तेसहं तदा;

पोसेन्तो मातापितरो, पब्बज्जं न लभामहं.

१०८. ‘‘महन्धकारपिहिता [तमन्धकारपिहिता (स्या.)], तिविधग्गीहि डय्हरे;

एतादिसे भवे [भये (सी.)] जाते, नत्थि कोचि विनायको.

१०९. ‘‘बुद्धो लोके समुप्पन्नो, दिप्पति [दिब्बति (क.)] [जिनसासनं (सी.)] दानि सासनं;

सक्का उद्धरितुं अत्ता, पुञ्ञकामेन जन्तुना.

११०. ‘‘उग्गय्ह तीणि सरणे, परिपुण्णानि गोपयिं;

तेन कम्मेन सुकतेन, पटिमोक्खामि दुग्गतिं.

१११. ‘‘निसभो नाम समणो, बुद्धस्स अग्गसावको;

तमहं उपगन्त्वान, सरणगमनं गहिं.

११२. ‘‘वस्ससतसहस्सानि, आयु विज्जति तावदे;

तावता सरणगमनं, परिपुण्णं अगोपयिं.

११३. ‘‘चरिमे वत्तमानम्हि, सरणं तं अनुस्सरिं;

तेन कम्मेन सुकतेन, तावतिंसं अगच्छहं.

११४. ‘‘देवलोकगतो सन्तो, पुञ्ञकम्मसमाहितो;

यं देसं [यं यं देसं (स्या.)] उपपज्जामि [उपगच्छामि (सी.)], अट्ठ हेतू लभामहं.

११५. ‘‘दिसासु पूजितो होमि, तिक्खपञ्ञो भवामहं;

सब्बे देवानुवत्तन्ति, अमितभोगं लभामहं.

११६. ‘‘सुवण्णवण्णो सब्बत्थ, पटिकन्तो भवामहं;

मित्तानं अचलो होमि, यसो अब्भुग्गतो ममं.

११७. ‘‘असीतिक्खत्तु देविन्दो, देवरज्जमकारयिं;

दिब्बसुखं अनुभविं, अच्छराहि पुरक्खतो.

११८. ‘‘पञ्चसत्ततिक्खत्तुञ्च, चक्कवत्ती अहोसहं;

पदेसरज्जं विपुलं, गणनातो असङ्खियं.

११९. ‘‘पच्छिमे भवे सम्पत्ते, पुञ्ञकम्मसमाहितो;

पुरे सावत्थियं जातो, महासाले सुअड्ढके.

१२०. ‘‘नगरा निक्खमित्वान, दारकेहि पुरक्खतो;

हसखिड्डसमङ्गीहं [साहं खिड्डसमङ्गी (स्या.)], सङ्घारामं उपागमिं.

१२१. ‘‘तत्थद्दसासिं [तत्थद्दसाहं (क.)] समणं, विप्पमुत्तं निरूपधिं;

सो मे धम्ममदेसेसि, सरणञ्च अदासि मे.

१२२. ‘‘सोहं सुत्वान सरणं, सरणं मे अनुस्सरिं;

एकासने निसीदित्वा, अरहत्तमपापुणिं.

१२३. ‘‘जातिया सत्तमे वस्से, अरहत्तमपापुणिं;

उपसम्पादयि बुद्धो, गुणमञ्ञाय चक्खुमा.

१२४. ‘‘अपरिमेय्ये इतो कप्पे, सरणानि अगच्छहं;

ततो मे सुकतं कम्मं, फलं दस्सेसि मे इध.

१२५. ‘‘सुगोपितं मे सरणं, मानसं सुप्पणीहितं;

अनुभोत्वा यसं सब्बं, पत्तोम्हि अचलं पदं.

१२६. ‘‘येसं सोतावधानत्थि, सुणोथ मम भासतो;

अहं [अत्थं (स्या.)] वो कथयिस्सामि, सामं दिट्ठं पदं मम.

१२७. ‘‘‘बुद्धो लोके समुप्पन्नो, वत्तते जिनसासनं;

अमता वादिता भेरी, सोकसल्लविनोदना.

१२८. ‘‘‘यथासकेन थामेन, पुञ्ञक्खेत्ते अनुत्तरे;

अधिकारं करेय्याथ, पस्सयिस्सथ निब्बुतिं.

१२९. ‘‘‘पग्गय्ह तीणि सरणे, पञ्चसीलानि गोपिय;

बुद्धे चित्तं पसादेत्वा, दुक्खस्सन्तं करिस्सथ.

१३०. ‘‘‘सम्मा धम्मं भावेत्वान [ममोपमं करित्वान (सी. स्या.)], सीलानि परिगोपिय;

अचिरं अरहत्तं वो, सब्बेपि पापुणिस्सथ.

१३१. ‘‘‘तेविज्जो इद्धिपत्तोम्हि, चेतोपरियकोविदो;

सावको ते महावीर, सरणो [चरणे (सी. स्या.)] वन्दति सत्थुनो’.

१३२. ‘‘अपरिमेय्ये इतो कप्पे, सरणं बुद्धस्स गच्छहं;

दुग्गतिं नाभिजानामि, सरणं गमने फलं.

१३३. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा तिसरणगमनियो थेरो इमा गाथायो अभासित्थाति.

तिसरणगमनियत्थेरस्सापदानं ततियं.