८. सत्ताहपब्बजितत्थेरअपदानं

३३. ‘‘विपस्सिस्स भगवतो, सङ्घो सक्कतमानितो;

ब्यसनं मे अनुप्पत्तं, ञातिभेदो पुरे अहु.

३४. ‘‘पब्बज्जं उपगन्त्वान, ब्यसनुपसमायहं;

सत्ताहाभिरतो तत्थ, सत्थुसासनकम्यता.

३५. ‘‘एकनवुतितो कप्पे, यमहं पब्बजिं तदा;

दुग्गतिं नाभिजानामि, पब्बज्जाय इदं फलं.

३६. ‘‘सत्तसट्ठिम्हितो कप्पे, सत्त आसुं महीपती;

सुनिक्खमाति ञायन्ति, चक्कवत्ती महब्बला.

३७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सत्ताहपब्बजितो थेरो इमा गाथायो अभासित्थाति.

सत्ताहपब्बजितत्थेरस्सापदानं अट्ठमं.