४. एकपुप्फियत्थेरअपदानं

१६. ‘‘दक्खिणम्हि दुवारम्हि, पिसाचो आसहं तदा;

अद्दसं विरजं बुद्धं, पीतरंसिंव भाणुमं.

१७. ‘‘विपस्सिस्स नरग्गस्स, सब्बलोकहितेसिनो;

एकपुप्फं मया दिन्नं, द्विपदिन्दस्स तादिनो.

१८. ‘‘एकनवुतितो कप्पे, यं पुप्फमददिं तदा;

दुग्गतिं नाभिजानामि, बुद्धपूजायिदं फलं.

१९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकपुप्फियो थेरो इमा गाथायो अभासित्थाति.

एकपुप्फियत्थेरस्सापदानं चतुत्थं.