४. अब्भञ्जनदायकत्थेरअपदानं

१४. ‘‘कोण्डञ्ञस्स भगवतो, वीतरागस्स तादिनो;

आकाससमचित्तस्स [अकक्कसचित्तस्साथ (अट्ठ.)], निप्पपञ्चस्स झायिनो.

१५. ‘‘सब्बमोहातिवत्तस्स, सब्बलोकहितेसिनो;

अब्भञ्जनं मया दिन्नं, द्विपदिन्दस्स तादिनो.

१६. ‘‘अपरिमेय्ये इतो कप्पे, अब्भञ्जनमदं तदा [अम्भञ्जनमदासहं (स्या.)];

दुग्गतिं नाभिजानामि, अब्भञ्जनस्सिदं फलं.

१७. ‘‘इतो पन्नरसे कप्पे, चिरप्पो नाम खत्तियो;

सत्तरतनसम्पन्नो, चक्कवत्ती महब्बलो.

१८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अब्भञ्जनदायको थेरो इमा गाथायो अभासित्थाति.

अब्भञ्जनदायकत्थेरस्सापदानं चतुत्थं.