५. एकञ्जलिकत्थेरअपदानं

१९. ‘‘उदुम्बरे वसन्तस्स, नियते पण्णसन्थरे;

वुत्थोकासो मया दिन्नो, समणस्स महेसिनो.

२०. ‘‘तिस्सस्स द्विपदिन्दस्स, लोकनाथस्स तादिनो;

अञ्जलिं पग्गहेत्वान, सन्थरिं पुप्फसन्थरं.

२१. ‘‘द्वेनवुते इतो कप्पे, यं करिं पुप्फसन्थरं;

दुग्गतिं नाभिजानामि, सन्थरस्स इदं फलं.

२२. ‘‘इतो चुद्दसकप्पम्हि, अहोसिं मनुजाधिपो;

एकअञ्जलिको नाम, चक्कवत्ती महब्बलो.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकञ्जलिको थेरो इमा गाथायो अभासित्थाति.

एकञ्जलिकत्थेरस्सापदानं पञ्चमं.