९. उपागतासयत्थेरअपदानं

३४. ‘‘हिमवन्तस्स वेमज्झे, सरो आसि सुनिम्मितो;

तत्थाहं रक्खसो आसिं, हेठसीलो भयानको.

३५. ‘‘अनुकम्पको कारुणिको, विपस्सी लोकनायको;

ममुद्धरितुकामो सो, आगच्छि मम सन्तिकं.

३६. ‘‘उपागतं महावीरं, देवदेवं नरासभं;

आसया अभिनिक्खम्म, अवन्दिं सत्थुनो अहं.

३७. ‘‘एकनवुतितो कप्पे, यं वन्दिं पुरिसुत्तमं;

दुग्गतिं नाभिजानामि, वन्दनाय इदं फलं.

३८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा उपागतासयो [उपागतहासनियो (स्या.), उपागताहासनियो (क.)] थेरो इमा गाथायो अभासित्थाति.

उपागतासयत्थेरस्सापदानं नवमं.